(كلنا موجوعين )
وآه يا وجع القلوب
وحال الناس مقلوب
نعاملهم بطيبه يخذلونا
ونآمن ليهم يخونونا
ونصدق كلامهم يجرحونا
في الوعود غدارين
وف كلامهم مكارين
ماطمرش فيهم العشره
وسرقوا مننا فرحتنا
والعيش والملح خانوه
وآه ياوجع القلوب
وناس مليانه عيوب
كله بينهب في كله
ماحدش بيرحم حد
وبينهم وبين بعض سد
وشياطين مش بتتوب
وعايشين بالشقلوب
والكل تايه عن سكته
والدنيا وخداه من آخرته
اللي بيستحل الحرام
ومابيسمع لحد كلام
عمال بيسرق وينهب
لا بيشبع ولا بيتعب
وضميره خلاص مات
واللي مقاطع الأرحام
وبيحسبها بالأرقام
واللي قطع حبل وداده
وباع مراته وولاده
أناني وهمه حاله
وبيهم مش شاغل باله
وزادت فينا الحكايات
وعملوا منها روايات
فضحوها ع الشاشات
كلها قرف ومواجع
وبلطجه ماليا الشوارع
حكاياتها ماتتحكيش
وناسها حرام تعيش
واللي خان اقرب ناسه
وقتل أخوه بفاسه
واللي دبح مراته وعياله
واللي ضرب أمه وأبوه
بعد مادلعوه وكبروه
فين الشهامه اللي كانت
الناس علي بعض قامت
والرحمه والضماير ماتت
والأمانه بينهم ضاعت
نحكي إيه ولا إيه
لو صخر يصعب عليه
ونفوس غلبها الشيطان
والبركه مابقتش ف مكان
ظالمين ونقول الزمان
واحنا اللي ضيعنا الأمان
ضحكة الناس كدابه
عاملين زي الديابه
وكآبه ع الوشوش
وبقينا عايشين وحوش
نلوم مين ولا مين
وكلنا موجوعين
خواطر (اشرف الدغيدي)
ليست هناك تعليقات:
إرسال تعليق