رباعيات لابويا اللى مات
.....................
وحشنى يا ابويا وفين من زمان
وحشنى وتاهت معانى الكلام
وفين حبك انت وفين الأمان
رجعوك لبيتنا ده صعب ومحال
وكنت يا ابويا الصعيدى التمام
تقول الكلام يبقي زين الكــــلام
وخوفك عليّا تِدَلع ..تشـِــــد
وما جانى حد في مكانَك يِسـِـــد
وحشنى يا غالى ...وفين انت فين
يافوق في العلالى ...بقالك سنين
واقولها واحشنى ..ودايبة ف حنين
ويارب اشوفك ..فى جنة ونعيـــــــــم
وللعِمة قصة يا سادة كــمان
ابويا لاففها بذوق واتـــــــــزان
وساعة ما اقول له يشيلها ...يقول
بِشِدة ..
يا بنتى دى رمز الرجال 
(أبويا مراكبى) يحــــب البحــار
وكلمة يقولها دى كلمة كبــار
وله فى المجالس مكانَة أكيد
وله كف جامد يهـٍـــــــد الجـــدار
لو أقدر يا أبويا أرَجّع سنيــــــنى
ولما تشيلني اشيلك ف عينى
وامتى يا قلبى اللى ضايع تجينى
وأقولك فى حلمى تواسى أنينى
ماهو انت يا ابويا الصعيــــدى
الاصيـــــــل .....
شديد العزيمة وطبعك جمـــــيل
حامينا وراعينا و كنت الدليــــــل
ولا يمكن القي لقلبك بديل
ولا عُمر كان اسم أبويا يُهَــــان
ده كانت له سُمعة تمام التـــمام
وكانت له هيبة تفوق الخيــــال
ابويا د كان هو أعظم مثال
ويرحــم أبــــويا ..ويرحــم زمان
وسِنُه اللي يضحك و عيشتُه الامان
كفايه انه فات لى كتير ذكريات
وعايش في قلبي كأنه م مات
ورحمة وسعادة يا سيد الرجال
يا قوة وطيبة و اصول واحترام
يا محمود واسمك ادب والتزام
تعيش جوا جنة في راحة وسلام!
يااارب ..
في الجنة ونعيمها يا حبيبي
توفي ابي من 40 سنة وكنت وقتها مازلت طالبة
ومن يومها وانا افتقده ....
ربنا يبارك في كل اب عايش ويرحم الاموات
ربنا يرحمك يابا.
#ميمي محمود عبدالجليل
بنت الريس محمود عبدالجليل ( المراكبي)
ادعوا له بقي والله كان محترم ويستحق الدعاء
ليست هناك تعليقات:
إرسال تعليق