Sayed Fouad .
سيرة الغلب
طب ماتيجى نفضها سيرة
لا انت أول حب عشته
ولا هتكونى الأخيرة
طول مافيك ميل لغيرى
لا انت عشى
ولا انت طيرى
طول ماراضية
تكونى عبدة
إنسى إحساس
الأميرة
طب ماتيجى
نفضها سيرة
شاكة إنك زى غيرك
وإن أى شوق لحبى
يجرح الباقى فى غرورك
خايفة منى
جتها خيبة
دنيتك هبلة ومريبة
هو مين فى الدنيا
أخلص
زى قلبى
والا مين يغفر
يسامح
زى قلبى
ما انت لو شوفتينى يوم وانا بندبح
يمكن تسامحى
لما غدر الكل نار
تطمس ملامحى
اخ خاين
زوجة خاينة
صاحبى خاين
صاحبة خاينة
شغل بالو
حكومة خاينة
إيه هيمنعنى ياشاطرة
أشوفها بايظة
إيه هيفرق واحدة خايفة وواحدة عايزة
وانت لما هتبعدى
راح تاخدى جايزة ؟!!
طب خدى باقى احترامى
عرى لحمك للى يدفع
والذى خلق الشيطان وغواه ماتفرق
دوسى أكتر
دمى هيطرطش فى وشك
الأمانة ان دمى
يسيل دموعى
واكبس البن فى جروحى
وانت تعلى وقلبى ساكت
لاجل مايكشفش
وشك
ألف ليلة وليلة فضفضنا وحكينا
اتخانقنا واتصالحنا
وافترقنا والتقينا
كان علاء الدين بيسرق
لاجل يفهم
لاجل يخلص
م الخيانة
كلمة حلوة
نظرة حلوة
لمسة حلوة
وانت حساباتك
رهينة
مين معاه
عاوزة منى كل حاجة
إلا حضنى
كلمة حلوة
نظرة حلوة
لمانزفى يبقى غنوة
سيرة للغلب وسنينه
سيرة للعشق وأنينه
ثم تقفى وتوصفى
خيبتى التقيلة
طب ماتيجى
نفضها سيرة
ربنا يهدينى
والا ياخدنى واخلص
نفسى يامتنمرة
م الموت أفلفص
واوهب النجمات
حياة
كى تلمع اكثر
واوهب الطوق
النجاة
من موج بيغرق
واقضى ع البؤس وغناه
بالكدب أكثر
تصبح الجنة الوحيدة
صدق قلبك
نبتة العشق الحلال
تطرح ملامحك
فخخى العالم عشان
تصطادى فرحك
مش عشان
تتمردى وتدوسى
حبك
الله غالب
طاعته واجب
ربنا يبعدنى عنك
الشاعر .. المخرج//
سيد فؤاد
ليست هناك تعليقات:
إرسال تعليق