هَسْأل أنا .. شاعرة الاسكندرية .. منى عبد الرحمن

هَسْأل أنا
هَسْأل عليك قلب الوليد
عُمْر الشَقَىَ ودم الوريد
هسأل أنا أرض الشوارع
والميدان
هسأل عيون البحر والموج
اللي خان
والرمل برضه هَوَشْوَشُه
وهَوَصِّي رُوحُه والحِيتان
وسفينة عايمة ف الهوا
من غير شراع
هسأل على القلب اللي ضاع
واللي ف عنيه كل الحكاية مُصَوَّرة
والصورة تحكي والدموع ترجع وَرَا
والنبض بيحاكي الكلام
والحلم يرجع للمنام
تَتْجَمَّع الحدوتة على وِش الزحام
شاشة بتعرض إللي باقي من السؤال
شايفاه ف صورة واضحة بعيون العيال
وأرد أسألني أنا
قلبي....؟ أنا بسأل عليه
يمكن ألاقي رد م العُمْر اللي باقي
أرُد بِيهْ
أنا مش بَدَوَّر بس على قلبي الِّي ضاع
أنا كُلِّي ضاع
كلِّي ركب ف المركبة من غير شراع
مَعْرِفش يوصل للأماني المُمْكِنة
مَعْرَفْش انا
بسأل وهسأل للخطاوي الشقيانين
يرضيكوا يعني أضيع كده
يملا البكا قنايات عيوني الدبلانين
ردوا عليا ف السؤال
جاوبوني طيب
ولاالإجابة شئ محال
بسأل أنا

منى عبد الرحمن

٣