" مين أنا " ★★★مشاعر وقلم : " محمد وهبي الشناوي "

" مين أنا "
★★★
مين أنا !
بتسأليني
مين أنا !؟

قلم ..
وأوراق وكتاب
وحروف كلام متبعتره
يمين وشمال
محتار إزاي
أجمعها كلام وكلام
أكتب إيه وللا إيه
أكتب إيه قبل إيه
أكتب إيه بعد إيه
أكتب شعر
وللا أغنيه
أكتب مدح
وللا مرثيه
أكتب لمين الأول
أكتب لمين بعدين
الحبيب الأول وللا الغريب
الحليب الأول وللا اللهيب
الشمال وللا اليمين
المنال وللا الحنين
البحور
وللا الدهور
القبور
وللا النشور
السلام وللا الٱلام
الملام وللا الإلهام
الكلام .. الكلام .. الكلام
كل يوم .. أدور ع الكلام
بالقلم ..
ويَّا الألم والأمل
حروف كتير متبعتره
يمين وشمال
محتار ازاي أجمعها
كلام وكلام .. وكلام
الندم ..
ع اللي كان وراح
العدم ..
داللي راح براح
مين أنا ..!
بتسأليني
مين أنا ..!؟
أنا يا سلطانه .. النجم
داللي لسه مطرحه
لا بيعرف .. ملال ولا ندم
ساق وأغصان وجذور
نهر وألحان وزهور
لا حد حابب يرتوي
ولا حد غاوي العطور
لا حد عارف يغني
ولا حد راوي الطيور
ٱلاف الكلمات
والقلم المسنون
أوراق وحكايات
والقلب المجنون
ألحان وأغنيات
والبلبل مسجون
مكسور الجناحين
والريح ف العيون
مشتاق للطيران
والغصن المفتون
مين أنا ..
ما تسأليش .. مين انا
قلم ..
وأوراق وكتاب
وحروف كلام متبعتره
يمين وشمال
محتار ازاي أجمعها
كلام .. وأحلام .. وسلام
★★★★★★★
مشاعر وقلم :
" محمد وهبي الشناوي "