بحاول افكر اروح يعني فين
برغم السنين اللي فاتت و عمري
ما بين ناس خبيثة و ناس طيبين
ما بين حكم نفسي و حكم الخلايق
و كام حد رايق و غيره ضنين
قابلت اللي لسه ف قلوبهم طهارة
و بردو اللي فيهم قلوب مجرمين
صحيح القليل من الخوف خطفني
و طبطب عليا و داوي الأنين
و فيهم رماني ف سكة مهالك
وشاف اني هالك و بابكي و حزين
و دول كانو ياما طريقهم ندامة
و خلوني امشي شمال مش يمين
معاهم صراحة ما حسيت براحة
ما عشتش سماحة عشان افاقين
لكن بالأمانة حياتهم ملانة
بحلبة و ملانة و خروفهم سمين
طريقهم بيفتح مفيش فيه إشارة
و صوتهم بيعلا و ليه ميت امارة
بكام كلمة منهم تخلص عبارة
عشان بيه و باشا و ناس مسموعين
كلامهم أوامر و طبعا مطاع
مصاحبين أكابر ٠٠ مناسبين بتاع
يمدو ايديهم يجيبو اللي ضاع
ايديهم ف جيبنا و مش مكسوفين
كلام الغلابة عليهم حكاوي
ما بين اللي نفذ و بين اللي ناوي
حياتهم غناوي و حياتنا انين
و اما الغلابة اللي منهم جنابي
و بينهم معارفي و أهلي و صحابي
قلوبهم تملي تطبطب ٠٠٠ تحابي
على اللي بيكدح و وقته ضنين
فدول ناس قلوبهم بتنضح طيابة
صحيح فرح نادر ف بحر الكآبة
تحس ف عنيهم تملي المهابة
و زي السحابة مطرهم حنين
ما بين دا وهذا مفيش يوم علاقة
مفيش يعني فرصة تكون الصداقة
و لو يعني حصلت بتتشاف حماقة
خلافهم حقيقة بعمر السنين
#فهمي_علي
ليست هناك تعليقات:
إرسال تعليق