أنا الأم ...! شعر .. احلام عمرنا

أنا الأم اللى ما وهبها الإله بعيال
و أنا الأم اللى ربت م البشر أجيال
و أنا الأم اللى ما ولدت
و لا جابت بنين و بنات
و انا الأم اللى لسة بتدعى
فى السجدة و صوت
الدعوة بتزلزل سبع سموات
أنا الأم اللى جالها هدايا م النجمة
انا الأم اللى ربت م العيال ياما
و بتجمع حبايبها على المعنى و ع الكلمة
أنا الأم اللى بتكبر و بتشجع عيال الغير
و انا اللى بتزرع الفرحة و تحصد م الجناين خير
أنا الام اللى شايلة التوب و بتزغرد من الفرحة
و انا الأم اللى بإيديها تلبس بنتها الطرحة
و أنا الأم اللى طفلها مات على حدود البلد كشهيد
و أنا الأم اللى دمعها سال مع الحسرة مع التنهيد
و أنا الأم اللى بتدادى و لا بتتعب و لا بتمل
و انا الام اللى مهما بكيت بجفف فى دموع الكل

١٤