=====================—مين منتظر مين ؟
**************************************************
مين منتظر مين ؟
كل يوم النجوم واقفة والحنين
والحلم شايفة ب يتسكع
مش ناوى للظروف يركع
ولا يستكين
مين منتظر مين؟
الشجر من يومها واقف
فى ايده ظله
وانا فى ايدى منين
لا همسة تسند فى شوقى
ولا كلمة تبل ريق حزين
الكف م البرد فيها رعشة
والدفا بعد الفراق ودانه طرشه
والحزن عامل فى القلب ورشه
مين ينتظر مين؟
العصافير بعد ما غنت هدمت العشه
كنتى فى الدنيا
بالنسبة لى اخر قشه
مين ينتظر مين؟
افترقنا وكل واحد شاف له ممشى
خلص الكلام
والصمت صار عنوان
والجرح وسط الجروح شاف مكان
وجع الندم مش انسان
بيرجع لورا
ويسيب حاجات متكسرة
حلم وجميل وانقضى
قصة من غير لقا ولا فضفضه
مين ينتظر مين يا ترى؟
2-
يوماتى
بااحضن فى حلمى
وهى بتحضن رماد السنين
ووهم
ان يطلع من الوهم حلم او يقين
يخضر جناين زارعها بعمرى
يوماتى باحضن فى حلم
واهو العمر مر
ولسه بااشوفك
وردة فى خيالى
بتقطفها ريح اللى شارى
جياتى وامالى بعقد وخاتم
باصبر فى حالى
يقولولى حام
فبااحضن فى حلمى
واعيش الخواتم
-------------------------محمدعبدالمقصودداود----------
ليست هناك تعليقات:
إرسال تعليق