وكبرت ياواد وبقيت تتحرك بصعوبة
وبقيت ف الصيف بتحس بنفس شعور طوبة
جسمك ضعفان وخطوط العمر ملت وشك
وكأنك بيت بس الجدران شاربة رطوبة!
....
وكبرت ياواد وان جيت تتذكر مش فاكر
القطر ماجاش ومازلت بتقطع ف تذاكر
انت اللي زمان اديت لشبابك مابخلتش
اما انت الان الكل ف ضعفك بيتاجر!
.....
وكبرت ياواد واهو ضهر سنينك بقى محني
منتاش مهموم وبكل امورك مش معني
انت اللي جنيت محصول العمر اللي طرح لك
دلوقتي خلاص اصبحت يا واد انت المجني!
........
وكبرت بقيت مش طايق تسمع ف كلام
وعينيك غايرين من كتر مرورك بآلام
والعقل خلاص مابقاش يتحمل ف ضغوط
ماهو بطل الدور بيموت ف جميع الافلام!
.........
وبقيت بتدور على سندة ومافيش عكاز
وعظام الجسم بقت ناخرة من بعد فولاذ
مابقيتش الشاب اللي بيسبق رجل الاحلام
وسفينة الوقت بقت تايهة مش لاقية بوغاز!
.......
ولا حد لوضعك بقى حابب الكل استاء
وكأن الشخص اما بيكبر فيه عيب او داء
وتلاقي الدنيا بقت ضدك بتدغدغ فيك
وتحس الصحة بقت واحد كان ليه اعداء!
........
فمافيش ولا واحد على وضعه بيفضل ويدوم
وطبيعة الزمن انه بيخذل مش حد خدوم
وزي ماعشت سنين عمرك ف الكون موجود
بيحي لك وقت تكون عايش ف الكون معزوم!
ليست هناك تعليقات:
إرسال تعليق