ما تيجوا معايا قبل ما نمشي مالدنيا..ندقق في القسم ثانية
ونفرز كبشة المكتوب
نشوف مين اتنصف فينا ؟ومين ساخط على حاله؟ ومين في الصبر يا اخوانا غلب أيوب؟!
غريبة ضربة ال( يا نصيب )!!.
ساعات بتبان لك الكفة يا واد راجحة
ومرتاحة على الآخر
وحظ صاحبها بظهر لك عداه العيب
تمصمص شفتك حسرة
وتضرب كف أيامك في أحلامك
تمد في بوز ضنا عمرك وتبرطم كما المجاذيب
تهز دماغ مرار عيشتك وتتحسر على حالك
وناسي إن آخرتها في لحظة تسيب
تفارق كل شيء فتنك .
شغل بالك وزهزه لك
ونساك اللي متعان لك في علم الغيب
مافيش راحة هتلاقها هنا يا خايب ؛
.لان حبلك المربوط في سرة دنيتك دايب
ولو مرة بكيت مالسعد والفرحة.
مافيش ثانية وتتبدل بك الكفة
وتنزل دمعه الأحزان مطر سايب!!
ومين فيها طلع منها
بحاجه ماللي شايفنها
قصاد عيننا أمل جذاب؟!
وفين راحت جبال الأمرا والوزرا
وكل من في بورصتها فتح له حساب؟!
ولو تسأل بطون الجوع
عن اللقمة اللي بتشبع :
صحيح الكورواسون أحلى من البتاو..؟!
.هتعرف إن قرصة جوعك الكافرة مبتفرقش
وإن اللي وهم روحك بوجود الفرق كان كداب
ولو ميلت عالساكن قصور الاعيان
وجرجرته معاك في البرد والوحشة
تلاقي أقصى أحلامه أمانه في عشة الغلبان
ولو مرة ضبطت الزوووم على الآخر
وكبرت ابتسامة فرحةالمشاهير في وسط الضوء
هتلاقيها ابتسامة كوتش
حاسدة ضحكة المغمور
في زحمة دنيته بالغلب
يضحكها وماهوش عيان
وياااااما كتيييير بنتهيأ حاجات فالصو
ونتوهم سعادة الدنيا في اللي هناك حدا غيرنا
و نقضى العمر نتشتأ بجملة تغمي في عيوننا
: ...(دي عيشة هباب)!!!
ولو إن الميزان معدول
مكنش دهه بقى حالنا
وعيشنا العمر كله اغراب!!
ونربط نفسنا في ساقية
من الأوجاع تقطعنا .تمزعنا.
تخلى كل لحظة عذاب
ولو كلفنا يوم روحنا
وشيلنا غمامة الأوهام بإيدينا
وفركنا عيون روحنا
هنلقانا ضحايا بجد لارواحنا
.كتفنا وأربجنا نفوسنا بنية مش صافية
وبيعنا العمر بخسارة لأمل كداب!!
فيا كل اللي شاري الغالي بالبخس
. شوية عدل مع نفسك .
ويا ريييييت ترضى بنصيبك
من ال (ما فيش) من دنيا كارهانا وعاشقنها ..
.وفكر روحك الدايبة في دباديبها بان:
حبيبتك الغندورة دي دنيا
.ومهما تشعلقك بيها وجودها سراب
بقلمي عبير الصلاحى
من ديواني إديني أمارة
ليست هناك تعليقات:
إرسال تعليق