((بقى هيك حالتنا))
//////////////////////////////////////////
ايدي بإيدك يابو قدور
أمشي ت نطلع دوريه
ببلدنا نلف وندور
بلكي بنضبط حراميه
تعا ندخل على هالتاجر
بيقولوا عنو فاجر
بياكل لقمة الدراويش
و مو مهتم ويجاهر
يغش ببيعو واليحتج
تنبدل الشكوى وع الطاير
((متحصن شاري الضماير))
//////////////////////////////////////////
يدفع رشوه للقاضي
يقللو ياأبني ولاتهتم
ما بتكون الاراضي
وبسقي خصمك مر وسم
أخليه يبوس الاراضي
بسجنو يبكي دمعو دم
لا تقللي عداله كلام فاضي
((دستورنا حلال على الشاطر))
//////////////////////////////////////////
تركنا التاجر ومشينا
دخلنا دايرة النفوس
الموظف رفض يمشينا
لو حتى ايديه نبوس
صار بلسانو يسقينا
مرار ويرففس متل تيوس
قلنالو دخيلك يااخينا
اتبسم هالكان وجهو عبوس
((ووعدنا يجبر بالخاطر))
//////////////////////////////////////////
قال مد أيدك يللا هات
ما بدها كأني وماني
يا ولا هالاضباره تبات
ت يمضى زمانك وزماني
ولو تظن بتمشي هيهات
بتعيش أحلام واماني
لاحفادك تحكي حكايات
عني،،، يا عمي شو ناطر؟؟!
//////////////////////////////////////////
احمد صار أسمو حميده
انثى ميه بالميه
وعباره عليها يزيدا
غلط تبليغا للجنديه
وفريد مشهدلو فريده
وعمرا سبعين وشويه
وسعيد اسمو سعيده
مخطوبه لابن بهيه
وهادا ببلدي الصاير
//////////////////////////////////////////
ومشي نزورو للقصاب
ديبو بيحكي بأحلى لسان
الجلاميط يفرمها كباب
بأمر عيونك يابو فلان
خاروف وردي اكلو طاب
وحتما عليي كتير فهمان
عم اخسر طمعان بثواب
وبسمعتي مارح أخاطر
//////////////////////////////////////////
سجل خيي للتاريخ
ت بكره يقروا الاحفاد
زرعنا المحشي طلع بطيخ
واللي كتر علينا وزاد
للست سفاله عم بننيخ
وعن الكرامه صرنا بعاد
الضمير الحر نازل صريخ
((ودمعو ع خدودو ماطر))
//////////////////////////////////////////
شعر ؛ نذيردهان
ليست هناك تعليقات:
إرسال تعليق