قبل الأوان ***********رضا ابو الغيط

رضا ابو الغيط

قبل الأوان
***********
يا شمس يا مروحه
قبل الأوان بأوان
اللقمة ع المطرحه
مش حاسة بالغلبان
ف زمان بسيفه قطع
الرحمة م الإنسان
والطير ف بطن الجبل
بيآمن التعبان

لون النهار إنهار
والضلمة ع الأعتاب
والليل خسيس غدار
بيفرق الأحباب
وان جار علينا الزمن
وبإيده سد الباب
مين فينا حمل المحن
ف زمان عنيد كداب؟
يا شمس يا مروحه
ومطوحه الغاليين
من امتي نور الضُحي
بكا دموع العين ؟
واحنا اللي كنا سوا
ع الحُب متواعدين
ما تقولى فين الهوى
وللا الغرام راح فين ؟
معقوله تحت الرحا
نبض القلوب هيعيش
والحقد والمصلحة
هيفوتوا طعم العيش
يكسر سهام الخوف
ومقاصل الخفافيش
وللا الدموع ف الجوف
هتزيد من التطنيش ؟
يا شمس يا مروحة
ومطوحة المواعيد
القلب صابه الوجع
والجرح فيه بيزيد
والعين ما شافت دلع
وللا حتى كف الإيد
نشكى لمين والألم
والفجر لسه بعيد ؟ ؟
************************
رضا ابو الغيط