بُقْعِةْ حُب >>> بقلم ... منى عبد الرحمن

بُقْعِةْ حُب
وِبَنْسَى كتير
لكن تِفْضَل ف ركن القلب
بُقْعِةْ حُب
تِرَجَّعْني لحكايتي معاك
تفكرني
بأيام عيشت فيها وفيك
بعمري لما كان يناديك
بِحُرْقة قلبي لما تغيب
وكلمة حب لما تْصِيب
ونِنْ الروح بيشتاقلك
وعين القلب تندهلك
وانا وانت مع الأشواق
بنتخانق
ونتسابق
نعاند خطوتين لفراق
وكف إِيدِيَّه يِشْهَدْلَك
يِمِدِّ لَّك
ريحان أخضر وفيه أسرار
واخباري
بعيد عنك
أكيد بَنْهَار
وجِسْر لُقَايا جُوَّه عنيك
وفرحتي بيك
وروحك لما تندهلي
واحشني وانت من أهلي
لكن فجأة
بتقفل بُقْعَة جُوَّه القلب
وانسى الحب
بنسى كتير

منى عبد الرحمن

١