أمى ... كلمات الشاعر .. سمير محمود

اوقات بتمنى اني اشوفك
وارمي بأحزاني على كفوفك
واحكي وتحكيلي على ظروفك
وابكيلك وانتي تضميني
..................
وساعات يغلبني الشوق ليكي
فاجري على قبرك واناديكي
واحضن في خيالك واراضيكي
واقولك آسف سامحيني
...............
وكتير بشتاق المس ايدك
واسكن بين دمك ووريدك
وأهرب من لومك ووعيدك
واشكيلك وجعي وأنيني
...............
انا طول الوقت افتح سيرتك
مش عايز احس ان انا سيبتك
تعبان مش قادر على غيبتك
ولا حاسس نفسي وتكويني
...............
انا عايز اقولك وحشااااني
والفرحة في بعدك ناسياني
والشوك بقا زارع بستاني
ومحدش غيرك مراعيني
...............
ايه تسوى الدنيا من دونك
ولا حاجة ف شكلك أو لونك
دا كفاية البصة ف عيونك
ياساكنة عروقي وشراييني
................
تعبان ياحبيبتي ومش قادر
جوايا الحزن ملوش اخر
ورضيت بغيابك مش كافر
فياريت بزيارة تواعديني
#سميرمحمود

٩