النهار خايف يقرب .. بقلم الشاعر .م . فهمى على نصر

النهار خايف يقرب
م البيبان و ما حبهاش
خد سبع خطوات بضهره
قال خلاص تايه ما جاش
ما انتو عايزين تسجنوني
زي ما انتم مسجونين
بس انا الدمع ف عيوني
صوته اعلا م الأنين
و انتو خايفين فاترميتو
و انتهيتو و كله راح
يبقى ليه عايزين اجي
و ابقى ف عيونكم صباح
انسو اني ف مرة اجي
او اعدي و اعيش معاكم
الا لما قلوبكو تطهر
و الصفا يعلا ف سماكم
و اللي باع حلم الغلابة
للديابة و الكلاب
يبقى مش عايش ما بينكم
يبقى بينكو مالوش صحاب
يومها اكون ع الباب باخبط
حتى لو دمع ف عنيكم
اصلي يومها هابقى منكم
و ابقى عايش مش باجيكم
#فهمي_علي