بيني وبينك .. ناهد الموجى

بيني وبينك
⚘⚘
بيني وبينك هقسم الأحلام
أختارها وألونها قبل مانام
الحلم يبقى سنين هنا وهيام
⚘⚘
أحلام جديدة خاصة بيا وبيك
عنيه نايمة وهي حاضنة عنيك
وإديا بتلملم ف لمس إديك
وزهرة حلوة هناك بتجري عليك
والمطرة تروي م العطش روحي
والنسمة تشبه ف الجمال بوحي
والسلسبيل يسقيني وبيسقيك
والكون بطوله وعرضه ليا وليك
⚘⚘
والحلم يبقى حقيقة من غير نوم
أغرق ف بحرك وانت بيا تعوم
وياريت غرقنا يبقى دايم دوم
⚘⚘
بيني وبينك هقسم الحرفين
الحاء حبيبي انت نور العين
والباء بلاش يتفرقوا القلبين
والصبر علي بعدك أجيبه منين
⚘⚘
بيني وبينك هقسم الإحساس
انت حبيبي خلي والجلاس
والأهل والعزوة وكل الناس
من غيرك انت الجنة لا تنداس
⚘⚘
بيني وبينك هقسم النسمة
زفيرها ليا والشهيق قسمة
تسكن ف صدرك تزرع البسمة
يا ضي عيني يا قمر وناس

بقلمي✍
ناهد الموجي

١