(بطلو ده) بقلم .. رضا ابو شنب

الاسم رضا ابو شنب
قصيدتي الجديدة
الموثقة فيديو
وفي المجلات
(بطلو ده)

بطلو ده واسمعو ده
ياما لسه نشوف كمان
دا الغراب ابو ريشة سوده
علي صوته بالاذان
علي صوته في الخرابه
والفساد غطي الودان
خلي لينا الدنيا غابة
والسمك جوه الحيتان
السمك زي الغلابه
يحلمو باكل الحمام
والحمام ويا الديابة
يرفعوه وقت السلام
والسلام كان كدبة بيضة
نيمونا بالكلام
جابو امشير ويا طوبة
قتلو جوانا اليمام
والولاد ماسكين في طوبه
يكتبو قصة غرام
الغرام لبلادنا واجب
والمحبة مش كلام
والكلام لو يبقي ماسخ
يبقي احسنلك تنام
من زمان والقصة قالت
البشر دول مش تمام
مهما عاشو في المهالك
زيهم زي النعام
والنعامة عاملة بيضة
شكلها زي الرخام
والرخام يشهد علينا
لما قالو بتوع كلام
لما طمعو في ارض سينا
وكملوها بالجولان
لما قتلو القدس فينا
والزيتون ويا الحمام
وابني قاعد جنب مني
موتوه كان لسه خام
*********************
نفسي ازورك يا مدينة
او اشوفك في المنام
وافتكر مهبط نبينا
لما صلي في المقام
قالو فيكي الله اكبر
والنبي كان الامام
والفاروق جالك يكبر
لاجل ما يعم السلام
والشعار جواكي يكبر
بالزيتون ويا الحمام
لما يوم بتغيبي عنا
يبقي حالنا مش تمام
يبقي بنغالط ضميرنا
او بنمشي في الحرام
*******************
لما يجي في يوم ولادنا
يسألونا من اللي خان
من اللي هدم الف مدنه
من اللي غير في المكان
من اللي فرق بين حدودنا
من اللي قسم في السودان
الاجابة هتبقي صدمة
للي عايش من زمان
للي عامل نفسه قدوة
رغم خيبة الامتحان
اختلافنا كان ما بينا
من اللي يحكم في المكان
مش مهم بلادنا تغرق
او ياخدها الامريكان
اختلفنا في كل حاجة
واتقاتلنا علي الريادة
مين هيشرب قهوة سادة
ومين هيحكم بالميزان
اتفقنا في الخلاف
واختلفنا في الختان
واتعاهدنا في كل حته
يبقي جوانا الشيطان
بطلو ده واسمعو ده
لسه ياما نشوف كمان
دا الغراب ابو ريشه سوده
علي صوته بالاذان