**********************
هات الشنط
وف حضنها لِم الهدوم
حاول تقوم
واهرب بجلدك م المحن
وانسي الهموم
افتح شبابيك الأمل
وافرد جناحك للسما
وإلحق شعاع شمس الحياه
يخدك لفوق
وتفوق معاه
من كل أسراب الغيوم
خليك شجاع..............
وبلاش تخاف.............
وانسي اللي باقي من وجع
ف سنين عجاف
وبدون كسوف... ..........
أو حتى خوف.... .........
إرمى سلامك ف المدى
علي شمس طلت م السما متبسمه
بخدود جميله مورده
واستنى منها تمنحك
مليون عواف
إوعاك تخاف.................
وإنده علي الموجه اللى جايه من بعيد
داخل حدود بحر الحياه
تحدف بشوق طوق النجاه
للي ٱبتلاه اليأس
ف سنين الجفاف
حاول تقوم
أدف وعوم
وانسي اللي فات من دنيتك
وبعدادات ما يهماش
قطر الهموم
قيس السعاده ف سكتك
وارسم بإيدك ع الشجر
لون فرحتك
لون بقى شكل الحياه
وبلاش تقول من تانى آه
خليك شجاع
وامسك بسيفك طوحه وقت اللزوم
فوق الرقاب اللى تملى تأخرك
وأتمني يوم طعم النجاح
تلقاه بإيده يبخرك
إنت الوحيد اللي ف إيدك
فُرشتك
جت فرصتك
ترسم معالم الإبتسام
علي كل جدران سكتك
جت فرصتك
لون خطاوى الفرح ف جدار مركبك
ولخط سير الملتقى خد دنيتك
حاول تقوم ...أدف وعوم
اوعى الهموم لتموتك
وتكتفك ......وتقيدك
خاف م العيوب لتبقى توب
ساكن ولابس جتتك
إنسى العذاب وانسى العتاب
وبلاش تتوه بين الدموع
اللي ابتدت تخفي معالم فرحتك
فك الشنط ...رص الهدوم
على رف عالى ف الدولاب
واكتب عليه
انا ف انتظار كل اللى غاب
حاول تقوم وقت اللزوم
وافتح ف قلبك للسعاده
ألف باب....
وافتح كمان فيه شباكين
لجل اللي غاب
بالمختصر
فك الشنط
وبلاش وداع وبلاش سفر
طلع هدومك حُطها
ف الشمس تنشف م الدموع
آن الأوان تنسي اللي كان
وتشوف عينيك بر الرجوع
بالمختصر
انسى السفر
وتعالي نبدأ من جديد
وبنظرة العين اللي باتت تشتهي
يوم اللقا
نملا بالحب الوريد
وف بحر شوق الملتقي
نفضل نعوم
بالمختصر
قلبي اللي حبك مش حجر
وللا عمره كان.. زى الحديد
وتملي بابه بيتفتح
وقت اللزوم.................
***********************
رضا أبو الغيط
رضا أبو الغيط
ليست هناك تعليقات:
إرسال تعليق