لسه فيكى حاجة حلوة ... شعر .. فهمى على

لسه فيكى حاجة حلوة
و لا كله وجع و خوف
يعنى ممكن مرة نفرح
و ابتسامة ف يوم تطوف
و ابنى يلقى لقمة حلوة
مش تملى نقول ظروف
اصلى كنت زمان عشقتك
و فى عنيكى باشوف امان
فجأة صرتى واحدة تانية
حتى مش فاكرة اللى كان
لما طال الليل علينا
ف الشتا وسط الميدان
و الرصاص من كل ناحية
و الكلاب ما بيرحموش
كان فى ناس فاتحين صدورهم
جم قالو لنا ما تخافوش
علو صوتكم ... قولو هى
ف القلوب .. مش ع الوشوش
نمنا ع الاسفلت جمعا
كلنا حالفين نعيش
كلنا حالمين ببكره
فيه امل ما بينتهيش
كنا نسهر نحكى عنك
قلنا تبقى ... من مفيش
طول ما فينا هواكى يسرى
طول من نيلك لسه جارى
طول ما اهلك خير و طيبة
طول ما ابنك لسه شارى
كنا شايفينك اصيلة
تفرحى يوم انتصارى
ع اللى هانك و اللى خانك
و اللى باع عرضك و داس
و اللى ساب السوس بينخر
جدر عودك و الاساس
لما غير خط سيرك
لابنه فظبط له المقاس
فجأة بعد النور ما شقق
و النسيم الحلو جالنا
جبتى ناس مالهومش فيكى
كدابين .. كارهين وصالنا
زرعو فيكى خوف و قسوة
تخنقى بيهم عيالنا
و انتى .. عادى بتنصيفيهم
و ف ايديهم ... سالكة ... ناعمة
كله مش فارق معاكى
عايزة كل الشعب اعمى
ناسية حضنه وقت خوفك
ليه كفرتى باحلا نعمة
انما راجع لك و بادعى
القى فيكى لسه حتة
طاهرة .. صافية ما حد داسها
فيها روح مش بس جتة
بادعى لو هالقاها تكبر
تبقى ١٠٠ مليون و ستة
مش مهم تكون جريحة
او تكون مكسورة روحها
المهم .. ف حضنى تيجى
اصل حضنى دوا لجروحها
من عروقى دمى يجرى
يبقى غنوة بحس بوحها
#فهمى_على