================- فضفضة عينيكى
#######################################
وانا اعمل ايه
عينيكى غاوية فضفضة
تفتح مسام العشق يجرى النور فى الفضا
تعرفى
لو امسك ايديكى كل احلامى تنقضى
والاقى قلبى اللى سارح فى ملكوت الجراح
يقلب الليل صباح
ويخلى كل الحزن انشراح
من يوم ما شفتك وانا باانعى اللى راح
واكتب بداية جديدة لعمرى اللى اتسرق
ومن اول سطر فى عيونك الكون برق
كان لازم اعمل مقام
لنظرة عيونك وادخل الحضرة وانام
والدنيا كان لازم تختشى
سرقت مفاتيح الحياة من غير خشى
وسابتنى فى وسط الريح
والعواصف عرفت انى جريح
او كما العريان
ما بستحى
الدنيا كانت مزعجة
من غير امل ولا رجا
ومحطة نتدارى فيها
ونستنى المرتجى
نحكى حكاوى الحب والرضى
ونرسم لاحلامنا خطى
من غير ما ندى للحزن فرصة او نفس
نفتح عيوننا والقلوب
ونركب على اخر فرس
=====================محمدعبدالمقصودداود
ليست هناك تعليقات:
إرسال تعليق