===============- وكأنك بتقيسى نبض الروح
##################################
وكأنكِ بتقيسى نبض الروح
وكشفتى ستر القلب
بتعرى جراح متخبيين فى الجنب
لما بتسالنى ..وحشتك؟
حاجات كتيرة واحشانى فيكى
خوفك عليا
لما تاكسى يمر جنبى
لما لمسة ايدك تيجى جنب كمى
ولما اغضب ايديكى تقفل لفمى
لحن يفلت من شفايفك ساعة تجلى
زهور تطرح فى روحى
تزرعها نظرة من عيونك
غيرتك جنونك
كله ناقص من حياتى
خطاوينا فى الشوارع الضيقة
عشان ابقى جنبك
وهمسك يطول الروح من جوا
واقولك وحشتينى يا حوا
فتتعزف روحك لروحى احلى سيموفينية
مزيكا صولو
سيكا بياتى او مزيكة هندى
ولانك صعب تكونى بعيدة
كأننا اتولدنا بروح جديدة
وقلب واحد
وكأن الشجر والورود كانوا شواهد
على لحظة عبقرية
شىء مبيحصلشى الا لما يعدى م السنين الفين ومية
ونتشارك مع الاحزان فى امنية
وتقولى بكرة
وكأن (بكرة) فى سابع سما
حلم مواعيده ملغية
يا انتعاش روحى
بلاش كدا تخلى بيه
وترمينى فى بير عيونك المعميه
وايه الدنيا من غيرك
لو عشت انا بغيرك
لو نسينى طيفك
وانطفى فى القلب قنديلك
لمين احكى مواويلك
واغنى للحب فى ليليك
وانا فى العشق طفل ما سك لسه فى ديلك
=======================محمدعبدالمقصودداود
ليست هناك تعليقات:
إرسال تعليق