ياقطر العمر ... شاعرة الاسكندرية .. منى عبد الرحمن

ياقطر العمر
ياقطر العمر يامعدي بمحطاته
بتجري وسابق السكة
مفيش عندك سنين فكة
وواخد كل عمري معاك
ثواني بتيجي ف محطة
وتجري بسرعة لمحطة
طب استنى
راح احضن يومى واتملى
وساعة بساعة اتسلى
واحس بطعم دقاتها على بابي
واسلم ع اللي فات منها على احبابي
يادوبك شوفتها باصة بطرف العين
ولابترحم وتتوصى كده دقيقتين
طب استنى أسلم بس على توبها
وابص شويه على حلاوتها
وانسى بقلبي روح عيبها
واغني معاها واتمتع
وأجري وراها ادوب واشبع
مفيش فايدة
بتجري خلاص
وتاخد عمري ف محطات
وانا ولاعارفة اسابقك يوم
ولااشبع في محطة نوم
ياعم اجري
وخد كل الثواني كمان
دقايقك كلها أحزان
وناسك كلهم ماشيين
مفيش معنى فضل مهتم
محطاتك كمان عايشين
ولاواحدة ف عيني أهم
ياقطر العمر يامسافر
خلاص قلبي صبح سافر
ولايهتم

منى عبد الرحمن

١