هحضن أيامي .. الشاعرة .. مني عبد الرحمن

هحضن أيامي
وهوشوش قلب العمر أوام
يستناني
وهطبطب دايما على روحه
راح أترجاه يتمناني
وهنادي بروحي عليه واجري
إرجع تاني
وكفاية قسية
وحزن وفرقة
بلاش بالله تلعب بيه
واحضن أيامي وأستني
يمكن تحضني سنين الفرح
وامسح ف عيوني وانشفها
علشان أهرب من طعم الجرح
وأروح ع النسمة اللي تودي
بشويش راح اهرب وأعدي
وأَجَمَّعْ كل بذور الهنا
وازرعها أنا
وبإيدي راح اقطف زهراتها
وارسم شفايفها ابتساماتها
وهوشوش قلب العمر أوام
يستناني

منى عبد الرحمن