جناح الفرح ===بقلم.. سامح توكل ابوالسبح

جناح الفرح
===
وعايش عمرى فى الذكرى
ويكره الجاى

بلون أخضر ومتزوق
بلون الضى
وبجناح الفرح طاير
ومالى زى
أشوف الضحكه
زايناها بنات الحى
ووردك فى العيون طارح
أمل بسام
وسحرك فى الغرام
سارح مع الأيام
يدندن لحنك الطارح
بأحلى غرام
أنا بكره أنا امبارح
أنا الأحلام
تعدى النسمة تتهادى
وتهمس همس
ويرقص فى الهوى غصنك
يدفى الحس
وبيبوس الندى خدك
ويلمس لمس
تعالى نجمل الذكرى
ببكره وأمس
أنا العاشق تفاصيلك
أنا ضيك وقنديلك
أنا تبر فى شطوط نيلك
أنا البرعم أنا جيلك
ولو هتشاورى أنا اجيلك
أنور ها بقرآنك وازوقها بإنجيلك
أنا دمى روى سينا
وجمع شملنا مينا
أنا نيلك فى وادينا
أنا المرسى أنا المينا
أنا يوسف خزاين الأرض
أنا صنتك وصنت العرض
أنا موسى وشق البحر
أنا الصبر إللى داس القهر
غرامك ليل بيتردد معاه مواويل
ومحرابك صلاة الحب والتراتيل
ياقرآن النهار نور مع الإنجيل
يافجر الشرق ياشمس الهنا قناديل
====
بقلم..  سامح توكل ابوالسبح

٢