أنا أيه ...!! شعر .. عزام أحمد

أنا خوف
وحروف
وكسوف
وخسوف
أنا مد وجزر وصوت مخطوف ..!

مريت ع الحلم لاقيته كابوس
والوهم بيوجع كالعاده
كان وجعي يادوب شكة دبوس
والصرخه بتطلع بذياده
حبك للعالم كان كدبه
مش ممكن تكمل بسعاده
ولأنك صادق طول الوقت
طبعآ صدقت
ومشيت وبدأت
واهو فات الوقت وعدي عليك
كام واحد مد إيديه لإيديك
كام واحد فاضل من حواليك
كام واحد قالك عندي ظروف
أنا عشت ولسه وياما هشوف
أنا خوف وحروف وكسوف وخسوف
أنا مد وجزر وصوت مألوف ..!
⁦✍️⁩.................................
#عزام_أحمد