عصفور ضعيف ...! بقلم .. عزام احمد

عصفور ضعيف
لكن ظريف
عمال يزأزأ ف وداني
وشوش وقالي
أنا نفسي أحلي
دوقته من طرف لساني

فضل معايا
يحكي الحكايا
وحكايته حلوه وعجباني
وشهور تعدي
وهو عندي
ياكل ويشرب ف مكاني
نفرح شويه
نلعب شويه
نرقص ونسمع ف اغاني
ولما طال
بينا المطال
قرر يسبني وينساني
سألته مالك
وايه جرالك
قالي بلاش تترجاني
انا قولت طيب
هتعود قريب
قالي بلاش تستناني
وطار وراح
وساب جراح
تكبر ف قلبي وتملاني
واديني من يومها بعاني
غرقان ف همي واحزاني
وفضلت واقف في مكاني
يمكن يزأزأ من تاني
ويرجع يقولي
انا نفسي احلي
وادوقه طرف لساني......!
...............................✍
بقلم/عزام احمد

١ تعليق

١