في يُوم مِيلادي..
وانا واقفَة علىٰ حَرف الزَّمَن
باشُوفني وانا بادفَع تَمَن
لِكُل لَحظَة عِيشتَها
لَقيتني بَابُص
فِ عيون الَّليالي وادُور
وأرض دايْرَة تَحت قَدَمي
قُبور
لَقيت العُمر بيسَرسِب
من بين إيدِين زَمَني الِّلي فات
لقيتُه بكل الذكريات..مَعنىٰ انْتَهىٰ
سافِر بعيد
دايِس علىٰ جبين الشوارِع والحَارات
عمَّال بيِجري جَري مُوت
بعنِيه يفُوت
علىٰ كُل حِلم حلِمت بِيِه
وانا واقفة بَابْكي وبَشْتِريِه
طالِع لِسانُه مِ الذُّهول
مَفيش ولا حِلم اتقَبَل
ماانا بُست رِجلين كُل حِلم
وطَبَعت ليلُه بالقُبَل
لاجلٍ يعيش جُوَّايا ويحَقَّق مَصير
مَفيش دَليل
علىٰ كُل حِلم عِيشت فِيِه
غير الدمُوع
حَسرات وجُوع
وعيُون مَاليها كُل ذِكرىٰ عِيشْتها
ماتحَقَقِتْش
يا ريت.... ماجِيتش
علىٰ دُنيا قاسيَة ماتِتْعاشِرش
نَدَهْت فيها... علىٰ كل الليالي كتير
مَلقِيتش فيها غير.... مَفيش
كل اللي فاضِل عَ الحِيطان
حَبِّة دموع.. علىٰ قَهر.. على تَهميش
علىٰ لَحظات...
كانِت بتيجي ف بالي... بعد ساعات
حَبِّة فَرَح حَنِّيت بيها كفُوفي
شَعري وضفايرُه بالشَّرايط نُور
خَبِّيت بيها خوفي
حَسِّيت ساعتها شعور
بِحَبِّة عُمر باقي
وان التلاقي مُمكِن.. ينَوَّر حِلم..
من لَحظَات عُمري الحَزين
يِملاه فرَح.... يبعِد أنين
ويخلِّي شَط النِّن يضحَك من جديد
لَحظات سَعادَة باشُوفها
ياااااااه
رُوحي بتِتنَفِّس حياة
لكنه..حتىٰ هذا الشعور
في لَحظة مَات
ضاع النَّفَس مِ الرُّوح
وضَلِّمِت بعدُه الحَياه
فِ يُوم ميلادي
وانا واقفَة وَحدِي علىٰ حَرف الزَّمَن
ليست هناك تعليقات:
إرسال تعليق