======================- شكرا
################################
شكرا
سمحولك تقعد فى الركن الضلمة
وتجدل من حلمك حبلك
تشنق اخر رغبة فى املك
شكرا
قافلين كل بيبان الشمس
وسحاب كاسح
يتسرب فى وريدك من غير حس
طاردين النور من شوارعنا
وبيهدوا بيوت البنى ادم
وبيبنوا قصورهم فوق مصانعنا
زارعين الارض بخوف جائع
بالطول والعرض مواجع
والحتة اللى الفجر بيطلع منها
اسلاك شايكة وموانع
الناس بتبور فى مواسها
وبتشيب من اى زوابع
الروس بتطاطى وبتلحس شىء باغى
طول ما اذان الفجر مش طاغى
بيخاف السايب والمربوط
وبيموت فى الحلق الصوت
2-.......................................
-ف صباح الوهم اللى شاغلنى
سنين وسنين
كأنى انا وانتى فى دور تكوين
وان الحب ح يزورنا
جناين ويخضر فينا الحنين
صباح الوهم يا نسمة
مخاصمانى فى كل رصيف
انا التايه فى كل فصولى
شتا وخريف
وحبك خلى قلبى ضعيف
صباح الوهم ع الارض
اللى مش حابه تشوف عشاق
وكارهه الحلم لو اخضر
ويتمخطر صبح وليل
يا رافضه تسيبى اى جناح
اطير وابنى عشفى واعيش فى براح
واغزل طرحه بالبهجة جوا هناك
لبنت ملاك
بتعشقنى كل صباح
,وتقول اهواك
====================محمدعبدالمقصودداود
ليست هناك تعليقات:
إرسال تعليق