لملمينى
جمعى عروقى اللى صبحت
حبال و ربطت
بين ترابك و بين وتينى ..
..
لملمى الروح المفارقه
و لا اقولك لا خلاص
ما عادتش فارقه
اتساوت الحالتين فى عينى ..
..
كونى احيا او اموت
انطق فى موتى و لا
احيا بالسكوت
العمر يتسمر قصادى او يفوت
تقسى عليا او تلينى ..
..
ماهو كله راح
لما شال ابويا البندقيه
كبروا و رسموا النصر ع السلاح
و اما ضاقت الدنيا بيا
قالوا اصبر ده الكفاح
و اما دمى سال ك ميه
زغردوا و هللوا
شاوروا و قالوا المسك فاح
و رجعت من تانى لطينى ..
..
دمى
بطوب دارنا اتخلط
عضمى مبعتر بين فوارغ الرصاص
و بين الزلط
حتى الصراخ اصبح غلط
مدى ايدك كممينى ..
..
امنعينى يكونلى صوت
علمينى اندغ الحلم و ابلع بالسكوت
عودينى طعم الحسره
هو فيه الاهه قوت ؟
شبعينى ..
..
شبعينى من الندا و من انتظار
المستحيل
امحى جوايا الفروق بين الامل
و بين الالم
بين العدو و بين الخليل
فوقينى ..
..
و علمينى مااحلمش تانى
محفظش شكل الارض و لا الشجر
و لا المبانى
علمينى اكون انانى
لا احب امى و لا ابويا
و لا اواسى حد و لا يواسينى ..
موتى الاحلام فى عينى ..
..
ليست هناك تعليقات:
إرسال تعليق