جوايا مصانع وآلات
ومدافع تضرب ف ايلات
وف راسي قنا*بل بتفجر
وطبيب بيعالج ف حالات!
.....
افكار مع بعض بتتصارع
والماضي بيقلب لمضارع
وحواري بتشكي من الضيقة
وغريب بيدوّر على شارع!
.....
وسهام على حيطة ف قلبين
وخطوط محفورة على جبين
وشوية ناس مالهاش مبدأ
على كل حبالك لاعبين!
....
انا جوه كياني مريض نفسي
بيقاطع لكن مش بيبسي
ودموع ونحيب طفل بيصرخ
علشان مصاصة وكيس شيبسي!
......
ف العقل بقابل مساطيل
وشروع ف جرايم وقتيل
ودموع م الصعب ف يوم تنزل
من غدرك سالت ياعُطيل!
.......
انا نَفسي معايا بتتخانق
مسجون مع اني منيش سارق
وكأن انا واحد نفسيا
بيمر بظرف مهوش طاريء!
.....
انا جوه الخايف من بره
وبلاد مانامتش ف بيت قارة
انا قلب بيستر عوراته
وف نفس الوقت بيتعرَّى!
........
انا فيا هدؤ مليان زيطة
وفراق اطرافه على الحيطة
وجبال مش قادر اطلعها
بطلعها يادوبك ف خريطة!
.....
انا نفسي ف قسط من الراحة
ومااشوفش منافس ف الساحة
انا نفسي ف ناس مابتجرحشي
ولا احس معاهم بوقاحة!
ليست هناك تعليقات:
إرسال تعليق