قصيدة
( بنت حلال )
في يوم الجمعة تستني
تشوفي الكل حواليكي
قبل لحظة الترحال
لغز مايعرفوش غيرِك
وسر من أسرار
رب العِزة والإجلال
واتجمعوا يا حبيبتي أحبابِك
نامي مطمئنة
موعدنا يا أمي في الجنة
ومفيش كلام يتقال
غير إني شُفتهم شايلينِك
بس انا المتشال
..........................
الكلام جوه الحلق واقف
واللسان يادوب بينطق
كلمتين
والقلب بيصرخ وخايف
رايحة فين
متغمضيش
استنى حَبه
سيبيني أشبع من عينيكي
الطيبين
يلا قومي زي عادتِك
صلى ركعتين
ساكته ليه يا أمي اتكلمي
سمعيني حتى وجعك والأنين
أه وألف أه
يا اللي وجودكِ في الوجود
كان هو الحياة
رايحة فين
حتسيبينا لمين يا أمي
في ليل حزين
ليل طويل
أطول من كل اللي عيشته
ف حياتي من سنين
غصب عني
مشيت وراكي رغم الخطاوي
مش قادرة تمشي خطوتين
وغصب عني
وقفت وانا باخد عزاكي
متغمي العينين
وقف الزمن بعدِك يا أمي
والشمس غابت لما غيبتي
رافضة تطلع من يومين
مع السلامة
يا أطهر قلوب البشر
يا أحن قلب اتخلق
من الرضا واللين
مع السلامة
والطرحة بيضة يا أمي
زاينة الجبين
رايحة تحجي يا أمي
والا رايحة تزوري
بيت نبينا الأمين
عزاءنا يا غالية إنك
بإذن ربي مطمئنة
فاطمئني
وطمني كل الحبايب
رغم مرارة الفراق
كلنا بخير يا أمي
وكلنا صابرين
وبندعي رب الفضل والمِنة
يجمعنا معاكوا في الجنة
اللهم آمين
كلمات إبنك / أسامة أحمد رفعت
ليست هناك تعليقات:
إرسال تعليق