موال "وفاء الأرض"
شعر "سعيد حمدى"
يا ارضى يا طيبة يا حافظه مجهودى
ياسترى وعرضى واصل لوجودى
يا شاربه عرقى بالحنين جودى
العمر فيكى قضيته مرار قاسى
جبيني شلال عرق نازل على فاسى
بدرتك همه وحماس ونهجت انفاسى
خايف يخيب العشم وتدبلى عودى
★★★★★★
محراتى سرح ضفايرك فى الضحى البدرى
والفاس خطط جبينك والميه راح تجرى
والساقيه تعزف نغم ويزقزق القمرى
ع التوته واقف يغنى مواله فرحان
لما روينا الشراقى اللي كان عطشان
وادى الندى يسرى في قلب العيدان
واطمن البال وايمانى ملا صدرى
★★★★★★
شب النبات فارس فى طوله وعرضه
يلعب ويا النسيم لما خضر ارضه
هزم الآفات ودايما للوحش طرده
يتباهى بسواعد عفيه سهرانه ترعاه
شايفه السعاده وكل الهنا وياه
وإيمانهم بربهم هو السند والجاه
وحمدو الإله فى كل صلوات فرضه
★★★★★★
شعر "سعيد حمدى"
ليست هناك تعليقات:
إرسال تعليق