أنا .... الشاعرة .. منى عبد الرحمن

أنا
أناالقاعدة
ف بطن الكلمة بستنى
تجودلى بنبضها وخيرها
أنا اللى افرح بتبشيرها
واشوف منها
حروف تجري قصاد عيني
تقوللي تعالي زقيني
وحطيني مع الهمسة
تناديني
أطبطب ع الحياة حبة
تغني بشوق ومحبة
واكون مرسال لحب جديد
واكون اللحظة والمواعيد
وبلضم بالحروف توكة
تضم الحس والمعني
وأنزل سلم النغمات وأطلع منه بالمغنى
أنا الغنوة اللى قالها الورد
رواها بالحنين والود
عشان ازرع حياتي حياة
نغم نابض بحب الله
وانا اللي نفسي بتلومني
بتألمني
وتحكيلي عشان ارضى
وتاخدني لحدة أرض باب الله
ونتشعلق أنا وهي ف عرض حماه
أنا الإنسان ف كل مكان
أنا الشط اللي ميضمش حياة مظلوم
وانا اللي بفرح المهموم
وانا الزهرة
وانا الريحان
وانا القاعدة
فى بطن الكلمة بستنى

منى عبد الرحمن

١