درويش .. بقلم .. أحمد الجندى

من فوق شواشي الدندنة
قاعد كما درويش ولي
صوت الأدان يشبه غنا
حس بأمانه وبصلي
أرمي بياضك ياجدع
قول إنت مين
أية الحكاية وأية حصل
خلاك حزين
أنا قولت أنا عملت البدع
كل الخدع
حتى الودع يامغرمين
كدااااااااب
عشق السراب أفضل عذاب
للمرهفين
مين اللي ساب مين إللي داب
من الحنين
سابو الجراح متلتمة
شافو الحقيقة المعتمة
كان ذنبهم صدق الإيمان
بأضعف أمل
كان ذنبهم إن الأمان
كان محتمل
الدرب عتمة مظلمة
ياعاشقين
مين كان وعدكم بالهنا
طول السنين؟
لو كان أمانكم محتمل
كان أكتمل
لكن إيمانكم كان ضعيف
عيل لقيط حلمه الرغيف
والحلم أصلا مستحيل
من غير أمل
فمنين أمانكم تعرفوه
ومنين رغيفه هيلاقيه
لو كان ده حلم إزاي يتوه؟
الحلم كان أصلا جنيه
وحبة فلل
كل المِلل مظلومة فيه
الحب أصلا كان هروب
من الخلل
صبح الخلل متحامى فيه
فمتسالوش الحب لية
صابه المَلل
أنتو اللي إيمانكم ضعيف
بأضعف أمل
#أحمد__الجندي