آخر ليله كات ف هواكى
فضلت كتير قاعد استناكى
وعقلى يقولى مش جايه
شربت سجاير يومها كتير
واتنين قهوة وخمسة عصير
حتى الشاى سقعته معايه
وبعد ما كان قلبه ملهلهب
أصبح بارد زى هوايا
تعب الكرسى السهران جنبى
مييل من تعبه حسسنى بذنبى
يجى ميت مره ابص ف ساعتى
زهقت منى ولاعتى
بدأت تلفظ آخر أنفاسها
احتجيت على الساعه كتير
ليه بتممشى الوقت بسرعه
وكل دقيقه يرن جراسها
حاولت أدى لنفسى ثبات
واحرك جامد أجزاء جسمى
أصل أنا حاسس برد ممات
واضح ع لونى وعلى رسمى
فجأه وقلبى اتنطط منى
أمسك فيه ويبعد عنى
عرفت ساعتها إنك جايه
قمت أبص لروحى ف مراية
اظبط حالى واغسل وشى
شكلى اتبهدل آه منكرشى
اصلى بحبك حب جنان
ولا مكسوف ولاخجلان
ما أنتى نبع وكله حنان
ومهما هادارى برضه يبان
لكن لحظه وكانت قاسية
لما لقيتك برضه ناسيه
بيعتى حياتى ف لحظه طيش
استناكى تيجى ؟ مفيش!
قلت خلاص خليكى ع راحتك
ماهى مش اول مره بتحصل
ياما كتير من قبل سامحتك
مفكرتيش إنى راح أزعل
ولا ف عنيك الحزن لمحتك
نص وعودك كات كدابه
ولا قدرتى حتى طيابه
زيك زى البشر الباقى
معدتشى فيه الحب الراقى
يظهر كل الدنيا ياغاليه
مش محتاجه إلا ديابه
سعيد عباس الضو
ليست هناك تعليقات:
إرسال تعليق