نوم العوافي..الشاعر .. موسى سعودي

نوم العوافي..
اجمل حاجه في الدنيا..
إنك تنام..ويجيلك نوم...
من غير افكار..
ولا حتى إنك تعرفلك..
ليل من نهار..
مطرح مايجيلك نومك
تنام..
لا يهمك فرشك
ﻷ...
ولا يهمك حتى غطاك
في عز حرك.
وف عز شتاك
وتكمل نومك
حتى ولو حواليك مليون طبال
ولما تصحى
تلاقي حواليك ألف بسمه وبسمه
وأيدين بتتمد
لجل تاخد من لقمتهم..قطمه
لا تعرف هزار من جد..
وبجد..
عايز تسيبهم..تسيب
عايز تقعد...
تلاقي ألف حبيب
لا حد يقولك. .عيب
حتى لو قلت العيب
ولا حد يؤمر...
يقولك هات. ..
ولازم تجيب
ياه...
لما الفكر يخيب..
الواحد يتمنى
إن الخايب...يغيب
لاتشوفه العين
ولا تسلم عليه اﻹيد...
المهم..
يبعد..عنك...
ويغور..بعيد
بعيد
بعيد
ده يبقى عند الواعي
ولا يوم العيد...
لكن..
ما عاد النوم بيريح
ولا عادت فيه أحلام
والنوم بيجيلك كسلان
ولما تصحى
تصحى همدان
كما العيان
قرفان
بتصرخ جنابك تقولك
لا فيه راحه ف نوم
ولا صحيان...

موسى سعودي