(اصرخى ) شعر .. سعيد عباس الضو

(اصرخى )
بتسالينى مين أنا
بعد عشره وطول زمان
انا اللى باع الهنا
وإشتراكى واللى كان
أنا اللى كان سهران عشانك
يمد أيده لكل إيد
انا اللى مادقشى حنانك
رغم ذلك كان سعيد
انا اللى اتعذب ف حبك
واتحمل عشانك ملامه
انا اللى صلى كتير لربك
عشان تقومى بالسلامة
انا اللى صد بصدر صامد
رصاص من غدر وخيانة
انا اللى أيده شقيت ف ارضك
تزرع الخير للجميع
وياما قلتلك واقع ف عرضك
حذارى م اللى يبيع
عشت فيكى خريف طويل
ولاشوفت فيكى يوم ربيع
ليه معايه تزأرى
وتغلطى وتبررى
ومعاه تكونى حمل وديع
تضحكى وتهزرى
وتفوتيله وتعذرى
ليه بترضى بالدنيه
فاتحه عينك ليه عليه
هو مستحمل شويه ؟
اللى باعك تشتريه
اللى داسك ترفعيه
واللى حبك بتبعيه
جنس أمك أصله إيه
إنت حد مسيطر عليكى
مين اللى مغمى عنيكى
اكسرى قيدك من اديكى
بصى حبه حواليكى
وأقتلى صوت السكوت
ألعنى صحاب اليخوت
ماتخفيش من اى موت
ليه بقيتى عنكبوت
اصحى يالا وفوقى حبه
طببى كل الأحبه
إنتى لو تدبى دبه
تلتقينى جابروت
سعيد عباس الضو