( النص الأخير)
------------------------------
كان نفسى اكرهك
واحيل حكايتنا للعدم
واهرب من الصوت الخفى والالم
وامحى سطورك من دفاترى واودعك
واختق اى لحظة تسمعك
اواى ذكرى ترجعك
بعدالضجيج فى صدرى ما احتدم
بين بعدى عنك وشوق ما ودعك
رغم انى عارف ما في مطر منتظر
والورد هجر الشجر واعتذر
وعضم الحروف ما عاد يحتمل
نظرة عينيكى
دلوقت لازم انسحب
اوتحت احساسى انسحل
ودا محتمل
لازم اكرهك
وارفع رايات الهزيمة
واكتب نها يتنا الحزينة
ما فضلش غير اسمك
عنوان لاخر حرف فى وجع القصيدة
عنوان لحكايتنا العنيدة
فانفض يا قلبى غبار الحزن عن عين ضحكتك
انت اللى عشت العمر تزرع حنطتك
فرح وحنين
راجع حزين
وهبت حبك لارض بور
مش كل شمس تننظر منها نور
حبك كان قميص الحزن من الوهم اتغزل
والقلب كان عصفور مكسور بلا امل
ورغم انى با اعشقك
لازم اكرهك
واكتب حكاية ينضرب بها المثل
على حلم ليله عرسه اخدوه المعتقل
كان لسه فاضل فى العينين شوق
وباقى فى الفجر امل شروق
وفاضل حضن حلمت فى يوم يكون طوق
يحصنك من كل هم
فا اسمحى لى اقابلك فى يوم ولوصدفة
العمر سيف بتار بلا رحمه
لسه فى قلبى كلام محتاج اقوله
لسه فى مشاعرى احساس نفسى انوله
ينفخ فى عضمى الربيع بفصوله
بهرب كتير م احساسى وباخون خيوله
وبا خاف من عينيكى لما تكون رسوله
اجلد فى كل الذكريات
وبرغم ضيق العمر وبعد المسافات
اول ما تيجى سيرتك فى اللى فات
انسى انى اكرهك بالذات
------------------------------
ليست هناك تعليقات:
إرسال تعليق