ست وراجل
-----------------
لا عمري هقــول أنا فنــــان محصلش
أو حتـته شاعر
ولا حتى هقول زي الخال وجـاهــين
وفاجومي الواعر
ولا بحلم أكون مي زيادة وفوق العادة
أو حتى بعافــر
ولا حيلتي عود مكاوي وعندي غناوي
ولغيري ناكـر
----------------
كل الحكاية إن الكلمة حـاســـاني زيادة
بتترجم لي كل مشاعري وأنا كلي سعادة
تمسح بإديها جوايا كتير وبكون محتاجة
ساعات تصرخ بلساني وتقول كفاية بزيادة
أنـــا جوايـــا بركـــان بيزيـد كــــل مـــــادا
وساعات تلقاها كما دلتا ونيلها نبتها غادة
--------------
بتــترجعني أم ضفايـــر وفستان كرانيـش
أو حتــى أفـك ضفايـــري واعمله كنيـــش
اجــري والعب ويــااصحابي زي المراويش
وادرس واحلم بالجامعــة وشهــادة تعيش
واتحب واحب واخاصم واهــو كله رتوش
----------------
أنا قلمــي نبضي وحـروفي في وريـدي دم
طـول مابتجـــري أنــا بحيا بلا مـــدح وذم
بجــــري عليها لمـــا أحــزن وأزعــل واتغـم
وفي فرحي تشاركني الغنوة والتك تك دوم
-----------------
وفي قرب حبايب والغايب قلــمي واصــل
واللي يغضبني يتحمــــل حروفــي مراجل
واللي يطبطب على قلبـــي قاضي عـــادل
أصل الحكاية احســاس مــش ست وراجل
ليست هناك تعليقات:
إرسال تعليق