طقوس الحُب!!
...............................
بحب الشاي يكون كُشري
واموت في الكُشري بالدٓقّٓه
وحاجه حِرشه أو حَدقه
وشُرب القهوه بعد الفجر
وقرطاس لِب ف البلكونه
ساعة العصر
واحب العيشه ببساطه
سوداني مقلي وبطاطا
وصوت الزحمه ف الميادين
واحن لصوت فريد وحليم
وبنت الفقرا ليلى مراد
وصوت ثومه فى سيرة الحب
وريحة الحاتي لما تهب
وكوباية عصير خروب
تكون بارده وتروي القلب
وطعمية وعيش بلدي
ودخان الدُره المشوي
وصوت البياعين بدري
وجرس الفُسحه لما يرن
وبيت العيله لما يُضم
وصوت فايزه فى عيد الأم
واحب اللمه في رمضان
وشكل موائد الرحمن
واحب التين
وقمر الدين
وطاجن رز بالقشطه
في فرن الطين
واصلي في الحسين جمعه
وجمعه تانيه فى القلعه
وطعم الفته ف الأعياد
وريحة المحشي ف الحَلَّه
وشُرب الميَّه م القُلَّٓه
وقصة حب بين شاديه وذو الفقار
وحمحمة الحمام ف الدار
يطير ويُحط عَ الغَلَّه
باحن تملي للماضي
طبيخ أمي وضحكتها
ولمتنا في حضرتها
ولما بافتكر صوتها
ألاقي الدنيا ضحكتلي
واحس طفولتي رجعتلي
............................Fathy Nada
ليست هناك تعليقات:
إرسال تعليق