الثعلب بيه
=========== عونى هشام
فى الحارة
عندنا 100 تعلب
فى بينهم واحد مكار
الباقى بيسيبه ويلعب
ودا لابد كدا خلف جدار
ولو تمشى معاه دايما تتعب
ولاتعرف له ايها كار
مرات تلاقيه هادى مسالم
وكتير تلاقيه كالمنشار
ان شاف بطه ولا دجاجه
ريقه يجرى
كمجرى الانهار
وان شاف كلب
ماشى فى الحاره
يجرى فى جحرة زى الفار
وسط اصحابه بيبقى زعيم
بزفه وطبله مع المزمار
فى الليل ماشى
كدا على كيفه
ويتخبى
مع اى نهار
الحارة مش عارف تجيبه
وراه شله هاتطلب بالتار
وف يوم شفناه نافش ريشه
وعاملينه شيخ الاخيار
الشله معاه مش سايبينه
ومكانه بقى بيت ومزار
اتصاحب على ناس ساندينه
وبيمشى عكس التيار
اه يا دنيا وغلبنا معاكى
وجرينا معاكى بالمشوار
لا عرفنا فين رايحه خطاكى
ولا خدنا نصيب م العطار
عليتى الواطى فوق راسنا
وفوق راسنا الحمل بقنطار
التعلب بقى تعلب بيه
وبقى ريس فوق الانفار
وفضلت انادى ياناس فوقوا
هاتجنن والعقل احتار
نسيتوا بسرعه فين اصله
اخرتها هانعيش فى مرار
من يومها وانا عايش حيره
وف راسى 100 الف قرار
معقوله ياناس هافضل وحدى
واجدف عكس التيار
الكثرة غلبتنى وتهت
هجرت الحارة وسيبت الدار
ود كله من مكر التعلب
زى الندل تمام غدار
زى الندل تمام غدار
=============
ليست هناك تعليقات:
إرسال تعليق