كشكول الحساب
============= عونى هشام
كشكول ومليان بالهموم
راسم حالات فى العموم
فوق السطور مترتبه
زى الرفوف
مرصوصه رص وفوقها كوم
على الحيطان متركبه
فى بعض كلمه
فالته منى غصب عنى
بدون كسوف تحكى الظروف
داخله جوه الكركبه
عشان حياتى
فيها قصه جوه قصه
وفصول كتير
شايله كومة اتربه
عايز ابدا م البدايه
لقيت حروفى فى النهايه
راسمه وش جوه وش
لناس كتير
فى الاساس باعت ضميرها
دلوقتى همّّ الكوكبه
فيه اللى باع واللى خان
واللى ماشى العوبان
واللى بيزمر فى زفه
واللى بيغنى ف طهور
واهو كله بيحب الظهور
واللى جاى بفلوس اساسها مهربه
فى ناس كتير ع الارصفه
والحال دا صعب انى اوصفه
البطاله وصلت مداها
لاحد فكر فين دواها
ومكن كتير بفعل غير
واقفه فى مكانها مخربه
والاشاعه فى كل ساعه
عن فقر قادم او مجاعه
او سوق هايفضى من البضاعه
ال ايه مكالمه مسربه
وشباب كتير خارج البلد
ضاع حلمه قبل ما يتولد
كان لابوه ضلع وسند
راح غريق وسط البحار
او تاه فى ليل مالوش نهار
والغربه وسط الجنه نار
شارب مرار ومفيش قرار
يحمى حقوقه فى غربته
وناس خلاص مفيش خلاص
لازم تعيش متغربه
لقيت البدايه راح اوانها
والشريف دافع تمنها
فى عمر راح
والمسافه الان براح
مفيش حدود مقربه
ومع الفساد فى برضه خير
والارض ماتهون ع الفقير
بعزمه فارس وبقلبه حارس
ان كان فى شيبه او صغير
وقت الندا شرار عيونه
يكون بقوة كهربه
ضميت دفاترى كلها
وحروفى جوه فى بطنها
يمكن فى يوم احتاج لها
ورجعت للماضى الجميل
وايمانى كان هو الدليل
يمكن فى يوم افتح دفاترى
وارجع اعيد التجربه
=============
ليست هناك تعليقات:
إرسال تعليق