ه ه ه ه
إكمنى حلانجى ولهلوبه
ألعب بالبيضه وب الطوبه
وأطلق م الديب ..الديبه
..وف يدى حلم الجدعان..
****
عنوانى ..عند القمرايه
ف دواية حبر..وبرايه
وسيجارة بانجو وشوايه
..وبلوزه رجالى وفستان..
****
مصاحب كل ..الحشاشه
وبنات قمرات ع الشاشه
وسكافى الجزمه والباشا
..وبياع الكشرى العدمان..
*****
ف الزحمه بلاقى السبوبه
ف جيوب الناس المغلوبه.
فى دنيا معانده ومقلوبه.
..ف الزحمه يغيب الإنسان..
*****
متعلم واكتب..فريره
أسماء الخمره والبيره
بحجابى تعد البنديره
..رجاله..وكل النسوان..
******
أجيب الحيطه..للحيطه
أتمتم والخلق ..عبيطه
تتوحم على قرن شطيطه
..ف الضلمه ..تحت الحرمان..
******
عملت محامى..وبدافع
عن لبس اليشمك والساقع
والزار والمندل والطالع
..عن قثل ديانه..وسوزان..
******
أنا المدردح..أنا المدردح
صوتى بح...فول و قمح
علمى بح...وغيطى شح
حقى بح....ف أى طرح
...كل طرح وله ميزان...
******
الصح تايه..فى الغلط
والدنيا ماشيه بالعبط
بط مسلم..بط ..أبط
وبط تانى ..بط ..لبط
بط كسل وبط..شبط
..وبط عايش ف التوهان..
*****
الشاعر/ابراهيم القاضى
ليست هناك تعليقات:
إرسال تعليق