مربعات الاصيل ===== عونى هشام

مربعات الاصيل
============= عونى هشام
اصيل كريم له علامه
فى الشده يجرى يجيلك
معروف ودوغرى ف كلامه
وفى الحق تلاقيه دليلك
:::::::::::::::::::::::::::::::
اصيل ودا طبع عيلته
يفرش لك حضنه متاع
تطلب يعطيك اللى حيلته
شاري صاحبه عمره ماباع
::::::::::::::::::::::::::::
اصيل والعفه زادة
ماشفته لابس قناع
لو زاد منصب مازاده
غير خير ويعطيه مشاع
:::::::::::::::::::::::::
اصيل بيفرح لفرحك
يغنى ويعزف كمان
بدمعه يداوى جرحك
ويفديك بنفسه كمان
:::::::::::::::::::::
اصيل ويرد غيبتك
فى اى شارع وحاره
يرفع مقامك وهيبتك
وينصر حبيبه وجاره
::::::::::::::::::::::
اصيل يحب جلوسك
وحكيم فى وقت الكلام
تعاتبه يقوم يبوسك
وبحضنه يرمى السلام
::::::::::::::::::::::
اصيل يغطيك بجسمه
لو حتى كان توبه بالى
حافظ صاحبه وراسمه
فى قلبه نجم الليالى
:::::::::::::::::::::::
اصيل ما يمشى فى عيبه
ولا يشهد شهاده زور
فى الحق واقف بهيبه
وكلامه فى الضلمه نور
=============•••
#عونى_هشام

٢ تعليق

١