ةةةةةةةةة
لا أنا شاعر..ولا قبانى
ولا القاصى ولا الدانى
ولا ودانى...
بتسمع حد....
ولا قلبى ملان بالشوق
ولا عيونى تبص لفوق.
لا أنا عاشق ولا معشوق
ولا مادد..حبال الود....
كرهت العيشه واللمه
وكلمة لما ..والممه..
وكل حاجه..تتسمى
أوان الجد.....
لا انا لعمى..ولا لخالى
ولا مدقدق..ولا مثالى
ولا خاطر ..على بالى
فلان ضدى..
وانا الضد.....
انا عايش..ومش عايش
لا انا ناشف ولا بايش
ولا باخد..ولا حايش..
ولا ليا..
سنان..بتعض.....
وبتقمع كما ..الباميه
وباتنطط..وانا الدميه
ومتعاير..بلا فونيه..
بأى عفاره..تتسد.....
ف إيد الخلق..دلايه
يويو ف رجل قطايه
جوايا ..زى برايه..
ف عز البرد..والصهد...
على اسمى..شدوا الخط
وياريتنى دجاج أو...بط..
وتلاجه ..تكون بالقسط..
وقصارى..
عشان الورد......
يابا ..صوتى لم دوى
وتحت سكوتى 100نوه
لا انا هيه..ولا..هو..
أنا البلوى...
فى حد الحد.....
لا انا إيجابى ..ولا سلبى
لكين قلبى يساع الكون..
رميت حملى على ربى
وانا ربى..إله العون..
يبصرنى..يصبرنى..
يغدينى..عرق جرنى
ويسقينى ..ندى ويصون
ةةةةةة ابراهيم القاضى
ليست هناك تعليقات:
إرسال تعليق