وانت معدي جنب مشاعري
اديني فرحة تعلّي ف سعري
وهاتلي قصيدة تميّز شعري
انه يكون بره التهميش
.......
وانت معدي ياريت تتأنى
وقولي ازاي ارتاح و اتهنى
وازاي احلم ولا اتمنى
وازاي فرحي مايسيبنيش
.......
قولي ازاي على بكره افوت
وامشي مابين الناس مبسوط
وازاي امنع املي يموت
وازاي اضحك وما ابكيش
.......
شيل ويايا شوية حزن
وامشي بقلبي لاقرب حضن
كل ورودي فوق الغصن
دبلت ماتت رافضة تعيش!
.......
وخدلك مني شوية خوف
وحط وجودي ف حلق الشوف
حرر كل شعور مكتوف
وخدلك مني شوية طيش
.......
وقبل ماتمشي كمان علمني
ان دموعي تفارق نني
واهزم اي شعور يؤلمني
وفوق الجرح ادوس بشويش
.......
يعني حياتي شوفها بعينك
واقسم نارها بيني وبينك
وحط شوية ف عِب سنينك
وانت ساعتها ما تلومنيش
ليست هناك تعليقات:
إرسال تعليق