(حوار الصح مع الغلط)
الصح انّب في الغلط
قاله الجميع فيك انخرط
ومجالي اصبح مش هنا
انا عُقدي باين انفرط
عندي سؤال محتاح ردود
ليه ياغلط دايما تسود
مع انك انت المبتلي
وانا اللي ف ايديا الورود
وليه معاك حق وريادة
وليه ضليع ف الاستفادة
وليه وجودك يبقى سهل
ووجودي مسلوب م الارادة
رد الغلط بغرور وفخر
للصح قال انا ليَّ سر
انا اللي بنفث ف السموم
وانا اللي لليائس بجر
بلعب على حبل الضعيف
واللي فؤاده مش نضيف
وارميه في بحري واغرقه
واسوق على ورده الخريف
وارمي بشباكي ع الكئيب
واجعل شبابه كله شيب
لحد مايموت الامل
ويشوف خلاصه ف المغيب
واقول للفقير فقرك إهانة
وانك ملكش أي خانة
فيمد ايده ع الحرام
واغويله بخيانة الأمانة!
وانا اللي نافخ ف الغني
لقانوني يفضل مُنحني
واوهم جنابه انه يعيش
وبنفسه لازم يعتني
الصح قال اسمع بقا
انت الهموم وانت الشقا
مهما تزيد ف السيطرة
هطلع واقوم م الشرنقة
ليست هناك تعليقات:
إرسال تعليق