( إنسي الدنيا )
إنسي الدنيا وعيش أيامك
ماتسيبهاش تسرق أحلامك
حب وإعشق وهني أحبابك
إنسي همومك إنسي أحزانك
ليه تخليها تشغل بالك
وتنسيك ليالي غرامك
إوعي الهمّْ يسكن قلبك
ويحطمه زي ناس قبلك
وحِب حياتك قد ماتقدر
وازرع خير وإوعي تقصر
بلاش في الدنيا ياإبني تفكر
واضحك دايماً ماتشيل هم
محدش واخد حاجه م الغم
والله الدنيا ماتسوي ياعم
إوعى تكون كئيب في البيت
علشان روحت الشغل وجِيتّْ
ولو في الشغل مهما شِقِيتّْ
إوعاك تبخل علي أحبابك
وإرضي برزق حلال جالك
وخلي ولادك يفرحوا بيك
ولما ترجع يجروا عليك
ليه تخليهم كارهين لوجودك
أو يهربوا من قرب وصولك
وإوعي تهين أُم عيالك
دي بنت أصول بالخير جيالك
عاملها زي ماتتمناه لبناتك
هيا حبيبتك وام ولادك
خليها دايماً زهره ف بستانك
صون عِشرتها وشوف حلاوتها
منوره بيتك بمحبتها
وراعي مشاعرها وكبر بيها
واوعاك تنسي حنانك ليها
هيا نصيبك وانت نصيبها
وهيا مصيرك وانت مصيرها
هتروح فين من المكتوب
خليك دايماً ليها محبوب
إسمع منها وإديها نصيحتك
بلاش تهملها وخليها حبيبتك
وإوعي المال يكون مُشكلتك
وتبيع نفسك علشان مصلحتك
وخليك دايماً راضي بعيشتك
حُب الدنيا مش هيدوم
ومهما يزيد المال هيزول
إوعاك تظلم وتعيش ندمان
وإوعي تصاحب ندل جبان
أو يوم تيجي علي غلبان
إكسب نفسك وإرفع إسمك
عُمر الظالم مايوم راح يكسب
ومن الهم عُمره مايسلم
خواطر ( أشرف الدغيدي )
حقوق النشر محفوظه
