(وجاني عريس)
هاحكي حكايتي بكل امانه
يمكن تكون ليكم علامه
قبل ماتعيشوا زيي في ندامه
جاني عريس شكله جميل
وكلموني عنه كلام كتير
وبقيت في حيره ومرار وويل
من زن اهلي طول الليل
وعن صفاته قالوا وقالوا
وقالوا عن طيبته وكرم اخلاقه
علم وثقافه ومنصب كبير
دكتور في جامعه ويتمناه كتير
وانتي يابنتي عمرك بيجري
واصغر منك متجوزين
وعيال كتيره مخلفين
والكل قال فرصة وجاتلك
هتعوضك سنين صبرك
وشافه بابا وسمع كلامه
وفرح بيه ووافق عليه
وقاللي كلام خدعني فيه
قلت لنفسي الفرح جاني
وبعد صبري الهم غاب
ويادوب يومين كتبوا الكتاب
وقال لبابا بقينا عُزاز
ومفيش داعي لتأخير الجواز
الشقه جاهزه وعندكوا الجهاز
وشهر عدي كنت في داره
ويادوب يومين وراني ناره
ومن العذاب سقاني مراره
انسان مريض معندوش كرامه
شتيمه وسفاله ومعدوم الشهامه
وشهر كامل ضرب واهانه
واتحسبت عليا جوازه
كلها الحسره وندامه
وهربت منه من كتر ظلمه
وف بطني طفل حملته منه
واشكي لمين حظي ونصيبي
واللي ظلمني بابا حبيبي
نصيحتي ليكم ياأهل وبنات
اوعوا تستعجلوا الجواز
وخلوا فتره كافيه للخطوبه
واختاروا انسان شهم وأصيل
يكون طبعه جميل وباله طويل
حتي لو كان علي قد الحال
هيصون بناتكم وترتاحوا البال
واوعوا اختياركم يكون للمظاهر
ممكن يكون فقير لكنه طاهر
وعزة نفسه مش عند أهل المناصب
دي الرجوله والأصاله
هيا أعظم مكاسب
خواطر ( أشرف الدغيدي )
ليست هناك تعليقات:
إرسال تعليق