هقدر اعيش
------------------
بحثت كتير عن ذاتي
جوايا وملّقِتّنيش
م انا عايش ومش عايش
قابلنى الحظ معرفنيش
وسابنى وراح لأصحابه
وعاهدنى خلاص م يجيش
فضِلت ألاطم الدنيا
وتضربنى وأضربها
وانا ضربى خفيف بشويش
م هى دنيا قادره وأغربها
أنى صفر فيها بعيش
مجموع الصفر صفر
وصفر يعني مفيش
كتير ع الأرض من مثلي
مقهور لجل لقمة عيش
تحت خط الفقر بنعاني
جوه خانة التهميش
لازم ترضى لازم تخضع
تقول حاضر لجل تعيش
تغور اللقمه مدام نقمه
وانا واقف ولا بمشيش
ومش هقبل أكون نَكِرَهْ
ولا هدخل فى رف النيش
م علمونيش بِذُل أعيش
ولا ع الكسره ربوني
ولاخدناش كده ف الجيش
هاتحدى ظروفي واحَجِمّها
بألف لجام هلجِّمها
واروِضّها وهَهّزمها
وهقدر اعيش .
*عاطف صلاح *
ليست هناك تعليقات:
إرسال تعليق